كل الشوارع ضيقه …

كلمات الشاعر
الناصر صلاح الدين

.. كل الشوارع ضيقه
ومترشقه بصفوف حرس ..
.. إحساس كئيب
إنك تكون وسط الهوا قاطع نفس ..
.. وشعور غريب
إنك تكون زى الغريب محتاج ونس ..
.. صعبه الحياه
لما تعيشها فى القفص ..
.. مظلوم ورافضه المحكمه
تسمع مواجع شكوتك ..
.. آخرك بقى عمدان ورق
تسند عليها دنيتك ..
.. حتى الكلام مبلول خصام
مابقاش ينشف دمعتك ..
.. تشبه لضيف
لزماً يكون هش وخفيف ..
.. عايش وراضى بغربتك
يادى العجب من دا زمن ..
.. راسم على حيطان الهوا
حيره وقلق ..
.. خلاك ضعيف ضعف الوهن
تشبه قصاصه من الورق ..
.. فى ريح عتيه بالمحن
بتبعترك تطلع لفوق تنزل غرق ..
.. وانت اللى عشقك فيه سكن
يشبه قوى جنة عدن ..
.. الصبر فى جيوبك أمل
.. بتجدده ضحك بعرق ..
… … …
.. يادنيا ليه قصدانى انا
وكأن انا من نحت إيدك كالحجر ..
.. عماله فيا تنحتى نقش الوجع
سلمت لك كالرمل دايب فى المطر ..
.. أنا انا كل لما اطلعك
أنزل و أقع .. ؟؟
.. أنا كل مانوى أسهرك ..
ألقاكى دمعه معذبه فيا السهر ..
.. وأحس جدرى بيتخلع ..
.. يادنيا عيب بقى واختشى
أنا شعرى شاب ضهرى إنكسر ..
.. مابقتش حمل الإنكسار
ولا عنت قادر ع البدع ..
.. خمسين خريف أنا عشتهم
زى الشجر ..
.. من غير خضار من غير مطر
الخوف بقى طبع الهوا و المستحيل ..
.. أنا اليتم اللى اتحرم ضل السنين
وماهمنيش ..
.. أنا انا عشت فجر جريد نخيل ..
أغرق ندى لكن حاسس بالظمأ ..
.. عايش صحيح
لكن حياه مافهاش رمق ..
.. صبرى الطويل علمنى أعيش ..
ومافيش بديل .. غير إنى أعيش
ضحكي قليل ..
.. مع إنى أبدا مش بخيل
جربت أعيش الممكنات ..
.. واحلم كتير بالمعجزات ..
فتشت مش لاقى الدليل ..
يوصل معايا لسكِتِك ..
.. يادنيا بكفايه بقى
.. دا أنا كلى ليل ..
قررت أتحدى الملل .. واصبر لفوق المحتمل .. صبر الجمل ..
.. يادنيا عشقى مكمله
وان مال عليا أتحمله ..
وأحن له ..
.. واكتب رسايلى بدمعتى
أبكيها فرحه توصله ..
.. عشقى اللى خدنى فى لفته
دفانى فى الزمن الجليد ..
.. مشانى فارس سكته
وانا كنت لسه بتدى العمر الجديد ..
.. أنا عشت جنة دنيته
.. خطيت على يُتم الزمن ورميته البحر البعيد ..
.. عشقى اللى راكب مركبى
.. هو الشراع اللى إتفرد
فى بحور غرق ..
.. أنا عشتها عيشة الغريب
.. عيل فى أفراح البشر
منسى فى لهيب …
.. يادنيا بكفايه بقى
أنا شفت فيكى جبال شقا ..
.. وماعدش فى العمر الكتير
سيبينى أفرح باللقا ..
أعيش بقلبى الشقشقه ..
.. خلينى اطير ..
.. فوق السحابه وف السما
سبحانه ربى أما وهب ..
.. من غير سبب ..
.. بعت الغطا .. بعت الدفا
عشق الحبيب ..
.. ..