اوعى تفرط لحظة بأخوك بقلم الشاعر عبد الناصر الجعفري

إوعي تفرط لحظة في أخوك
وإمسك فيه بيديك وسنانك
ده لحمك ودمك وإبن أبوك
وساعة الخطر حصنك وأمانك
ولو ظروفك ومعايشك غربوك
هو إللي حتآمنه علي مكانك
ولو الناس غلطوا وسبوك
حيجيب حقك ويرد مكانك
ولو في وقت الشدة سابوك
مش حتلاقي غيره قدامك
عشم ومحنة عليه يرموك
حتطللب عينه يقول خدامك
ولو سألت سنينك حيجاوبوك
وحيقولولك عمل كتير علشانك
لو زعلانين وبينكم خلافات
إقعد مع أخوك وإعرف ماله
وما تنساش إن إنتوا إخوات
والحاجة إللي مزعلاك قولها له
وسيبك من كل إللي فات
وما تشيلش من ناحيته وإصفاله
ورجع من تاني العلاقات
وإطمن عليه وإسأل عن حاله
ده إنت الوحيد عنده بالذات
غلاوتك زي غلاوة عياله
يعني من الاخر في كلمتين
نصيحة ويا ريت تعمل بيها
شوف إللي فرق بينكم مين
ورجع المياه لمجاريها
وما تمشيش ورا الشياطين
خصامكم لبعض ده مصلحة ليها
لا الورث ولا المال دايمين
ولا الحريم إللي ربك غضبان عليها
وإحنا ضيوف علي الدنيا يومين
ومش حناخد حاجة منيها
حننزل تحت التراب فاضيين
أوضة متر في متر حنرقد فيها
واللي حياخد عزاك أخوك
يعني إمسك فيه بيديك وسنانك
كلمات الشاعر عبدالناصر الجعفري