عكس المسار الشاعر المصري احمد العراقي

عكس المسار الشاعر المصري احمد العراقي

كلمات الشاعر احمد العراقي

خلف ظل الانكسار
واخد قرار
يستحيل هرضى اكون
خانة في لستة الانتظار
طول عمري ماشي سكتي
عكس المسار

حالف ما اجيش على نفسي يوم
ولا اذلها
حالف لروحي “أجِلَّها”
وقَايِلَّها
مهما الهموم هتجيب غيوم
مستني يوم
تحضني فيه شمس النهار
زنهار
في محراب الشقا
وناصب لجهلي مشنقة
تارك صنوف المعشقة
للاحتياط
واقف في وش وشوش ورق
والجمع اخره مفترق
صبري ف رباط
عمر الهموم ما تهدني
ولا عمري هعرف انحني
وسط البلاط
انا اللي راضي بقسمتي
ورضايا بابي لجنتي
من غير ما افكر
امتى هاعبر
يوم واعديلها الصراط

السجن مش قضبان
ولا اقفال ولا مفتاح
السجن ممكن يبقى
روح ومسجونة ف براح
ما تقولش ان الكون فسيح
اوقات تحس ان الأمل
واقف على باب الملل
درويش على باب الضريح
بيوصف دواه
لكل من في الزحمه تاه
أو كل من طالب اتاه
لكن قصوره وعلته انه كسيح
جريح بيترجى الدوا
من طيف جريح
والقسمة ظالمة بطبعها
ناتجها ابدا ما كان في يوم
واحد صحيح

لكن برغم المستحيل والمحتمل
يبقى الأمل هو الحياة
في عز دوامة المحن طوق للنجاة
ويبقى العمل
انك تكون في خط سيرك
ماشي عكس الإتجاه.

تعرف تلاقي وسط
بحر الخوف أمان
تعرف تمثل دور بطل
او دور هطل
أو بهلوان
المهم انك تعيش
ازاي تلضم حبات الأمل !
في خيط .فَرَحْ من مفيش
ومهما في وشك
قَفِّلِتْ كل البيبان
ازاي تبان في الضلمة نور
بَنُّوْرْ وشيش
لؤلؤ بيضوي جوة مكنون المحار
اتعلم انك تسبق اللي يكتفك
وباختصار
لازم تكون جاهز لساعة الاختبار
والحُرْ مش حُر الكلام
الحُر حُرِ الاختيار
اللي تلاقي نجمه عاصي ع المدار
واللي عشان يرضي ضميره
بيمشي وحده ف سكته
عكس المسار .