ليل وليل بقلم الكاتب جبار القريشي

ليل وليل
……

الكاتب جبار القريشي

ليل.. وليل..!
عدكم ليل.. وعدنه ليل
بس الليل عدنه.. مو مثل كل ليل…!
إنتم ليلكم ظلمة.. ومتاهه…وخوف
واحنه ليلنه قنديل
صحيح الليل.. نفس الليل..
لكن هذا لا يعني..
القرآن نصاً يشبه الإنجيل
وصحيح الخيل.. نفس الخيل
بس يبقه الفرق..
مو بالشكل.. بالحيل
ويبقه الذيل ذيل..
يحامي عن الراس..
بس الراس حتماً..
أشرف من الذيل..!
المضايف شانهة الگهوة..
بس الگهوة ما تتغاوة بالفنجان..
إذا ما يفزعلهه الهيل
وحته الگاع ما تفرح..
إذا اجه الماي وحده..
وما تنخه اسهيل
ويبقه الوادي موحش..
لا زرع.. لا ماي..
شيسوه الوادي..
لو شح المطر والسيل
البيدر بالنظر.. ما ينحزر مرات..
چبير تشوفه..
بس يبان وكت الچيل
ظلمه وليل.. وشمعة وتيل
الشمعة بنورهه تطرد ظلام الليل..
ويغرگ بالظلام بلا شمعته التيل
وهيه الدمعة تتطوع تطفي النار..
ما يحتاج من تنزل عطف منديل
ومن تركض الخيل..
الفخر للخيال..
من گال الفخر.. لو غربلوا للخيل
زمن خله الكديشة..
تصول بالميدان..
والمهرة الأصيلة..
محددة بزنجيل
وبالدنية البشر نوعين..
نوع يخاف ملچ الموت..
ونوع بملچ موته يعيل
إشدعوة الريل.. يتباهه بفراگينة..
يمر مغرور.. لو طب المحطة..
يصيح آني الريل.. آني الريل
ليش الريل.. يگدر يمشي فوگ الگاع..
لو ما ينحني بكل عزته على الويل
خلف الله عليكم من خبطوتهه..
دنطوهه لهلهه.. ولو شبعت موت..
شوفوا إشلون تصحه..
وتمشي مثل الميل.
الحقيقة هاي.. مثل الشمس..
وهيه الشمس..
يحجب نورهه الغربيل!؟.
عدكم ليل.. وعدنه ليل
…..
عدكم ليل.. وعدنه ليل.
…………