اجمل سكن
اجمل سكن
ب اعتبار ان هي دي النهايه
لسه طالع م الرعايه وسط لمه
نفس الوشوش هما هما اصحاب الغياب
العتاب معادش ينفع
والورود ع القبر من امتي بتشفع
النهارده لسه بسمع كان حنَين
النهارده بس حسيت طبطبه
الكل بيشيل الغطا ويبوس جبيني
كنت محتاجها وديني
طول سنيني مشفتهاش
جايين تبوسو الجسم اللي ملفوف بالقماش
اااه يا وجع الموت وسط الشقايق
وقت ما بتظهر حقايق ويغيب سند
النهارده وللابد اخر لوقا
لفوا الوجع بشويش من غير بكا
احضنو الجسد النحيل اللي اتحرم
م الطبطبه وطالب سماح
انصبو الافراح لروحي
كل بوحي عندكم جوا القصايد رتلوه
جمعو الحرف المعافر وادفنوني وادفنوه
اكتبو ع القبر اسمي بلاش تقولو اني شاعر
الجسد محتاج امان والامن عند جنابو واعر
كملو الاحلام بدالي
احلمو بالارض والناس الغلابه
الدفاع عن الفقير احلا لحظات العباده
اللي نادا بعلو صوته وقال يا بلدي
اللي صابك نفسه صبني
ومُت قبل الموت ما يجي الف نوبه
لو رجع العمر بيها عمري ما هعلنها توبه
السنين مرت عجاف
واللي طاطا واللي خاف
واللي قال الشعر حي علي الفلاح
واللي نادا الحرف ملعون لو سفاح
المزيف والحقيقه
اللي شد الكلمه من رحم الحواري
واللي ناوي ما البدايه يكتب الحرف بتدني
غصب عني الموت اخدني يا رفيقي
هو ده الشيء الحقيقي في الوطن
هو ده الامر المتاح
بدون مناوره او كفاح
هو ده اجمل سكن
كلمات الشاعر
عصام ابوالعلا
