ح ابيع صوتي
اشمعنه فى الانتخاب صوتك يجيب ألوفات
وان بيعنا صوت الضمير تمنه فشل وسكات
لو فيه لجان في البلد بتحدّد الأسعار
كانوا اشترونا الصغار من يوم ضميرنا مامات
(هابيع صوتي)
يارب يعيدوا دايرتنا
وابيع صوتى تلات مرّات
وأفتح كـُشك ع الناصيه
واتاجر حبّه فى الأصوات
وابيع اسم اللى مات بجنيه
ماهم ماليـين لنا الكشوفات
وألحق م الفساد كومى
وأمسك عُمْلة الميّات
وايه فاضل مايتباعشى
وليه يعنى الضمير بالزّات
مانا بايع لهم بيتى
وساكن ترْبة الأموات
وابيع صوتى
,,,,,
هابيع وأقبض وأتريّش
وياكلوا بعض وانا مالى
لاشافنى شعب ولاشورى
ولا باين لهم حالي
لو اتوفـّر معايا جنيه
بتبقى الأم داعيالي
وماعرفش السياسه يابيه
بأقول والدنيا سمعالي
أنا همىّ أبات ليلة
معشىّ مراتى وعيالي
وابيع صوتي
,,,,,,
عشان خطرك هاجيب مرتى
تروح اللجنه وتعيّط
دى شاطره وعندها الخبره
و طول العمر بتصوّت
وحاتعلــّم على أهلك
فى وسط الورقه وتشوّط
ولويفضل لكم فكــّه
تروح الفرز وتزغرط
ونتعايق ونتْسقــّف
وساعة النشره هانزيّط
وأشوفك مرّه بتسقــّف
أروح من فرحتى معيّط
وابيع صوتى
,,,,,,
ولو تدفع فلوس أكتر
أنوب عنـّك فى أىّ يمين
ساعة قسَمْ الولاء أطلع
اقولها وكلهم سامعين
بأنى أرعى مصالحهم
واحافظ ع البلد والدين
وخاصّيه فى محمولك
تقول ان احنا مش فاضيين
ياخوفى دورتك تخلص
ولسّه ماجبتش الملايين
واسعار البشر تغلا
نجيب الصوت ساعتها منين
وابيع صوتي
,,,,,,,
حافـُضّ السيره واستسلم
وأقطع حبل أفكارى
واقول لك كلمة م الآخر
انا بايع مانيش شارى
أشوفلى عضو متريّش
اساعده عشان يبـيع دارى
وايه يعنى اللىّ أنا شايفه
يطفىّ لوعتى ونارى
داحتىّ النيل ماهش كافى
عشان يغسل فى يوم عارى
وافوّض للاله أمرى
يخلــّص للولاد تارى
وابيع صوتي
,,,,,,
تعالى وادفع القرشين
تعالى واشترى الأموات
أنا ومراتى والولدين
فى أسرتنا تلات أصوات
ولو صوت الراجل باتنين
نقولوا عاشت القرارات
ونتمنى انّ كلّ يومين
نلاقى جولة انتخابات
وابيع صوتي
,,,,,,,,
هابيع صوتى وانا راضي
وفايق يعنى مش مسطول
ومش طامع فى توظيفي
ولاعايز أكون مسئول
انا محتاج لقوت يومي
وابيعلك كلّ شئ على طول
ياريت الصوت يوكلني
رغيف واحد وحبّة فول
وابيع صوتي
كلمات الشاعر
سعد الشرقاوى
