بقلم … أحمد محمود حسن
زجل : ( كانْ الْقَمَرْ بَدُّوْ يِجِيْ )
~~~
كانْ القَمَرْ بَدُّو يِجِي
طْلِعْتيِ قَمَرْ عَ الْبَالْ
صِرْتيِ حَقِيْقَةْ مْأَكَّدِي
وصَفَّا قَمَرْنَا خْيَالْ
.
اسْتَنَّيْتْ لَآخِرْ مَسَا
انْدَهْتِكْ عَنْ السَّطحْ القَرِيبْ
فَاْقْ النِّدِي عَ مْخَدِّتِكْ
وتْتَّاوَبْ الْعِرْزَالْ
وصَارْ النَّسِيْمْ يطَرِّزِكْ عَ شَالْ صَوتِي زَنْبَقَا
ويْطَرِّزِكْ مَوَّالْ
فِقْتيِ …
انْدَرَا بَيْدَرْ عِطرْ…
وَطَّيْتْ بَوَّسْتْ الحَبَقْ عَ غِرِّتِكْ
وَطَّيْتْ بَوَّسْتْ الزَّهِرْ…
قلْتِي : فِيْ رِيْحِةْ صَوْتْ…
عَمْ شِمْ الْحَكِيْ…
وعَمْ حِسْ لَحْنْ جْدِيدْ
وشْعَرْتْ بِلَفحِةْ دَفَا مَرْقِتْ عَلَى خَدِّي
قَولَكْ شِي بَقْعِةْ ضَوْ؟
قَولَكْ شِي شَلْحِةْ غَيْمْ ؟
ولاَّ شِي نَجْمِةْ فَلَّتِتْ مِنْ وشْ الْمخَدِّي ؟
ولاَّ إنِتْ حَدِّي
عَ حَفِّةْ العِرْزَالْ ؟
كانْ القمَرْ بَدُّو يِجِي
طْلعتيِ قَمَرْ عَ الْبَالْ .
. •• بقلم … أحمد محمود حسن 3-9-2000 ••
