ساعات أمشي

ساعات أمشي مع الدّنيا كتفًا ب كتف

أشوف العمر بيزوغ من الأتوبيس ..

أشيل غربه بلاد الله وبيها ألِف

وندفع للحياه أنفاس

مداها الخوف ..

ياليل الورد يا بخته اللي بات ساكت

مع السكه اللي ماشياني أنا ..ساكت

ومهما سنينها تغلبني ..

وحب الناس يعذبني ..

لا يمكن لحظه هتغير

ولا هقفل بيبان الروح عن المشاوير ..

ساعات غُلبي بيندهلي بشكل خطير

أقوم م النوم أقول بكره خلاص همشي

هفوت للمدهشين ساعتي .. وكراسي

هعلق نجمه فوق كتفي وعلى راسي

وهدي تمام لأحزان الغياب والصبر ..

ساعات أهرب وبرده الناس بتنبر نبر

ياريت عاجب بياض جيبي ..

وصوتي ساعات يبان عيبي ..

ودمعي ولهفتي وشيبي

وكام حدوته خبيتها ف درج قديم ..

ساعات أضحك بصوت عالي لكني حزين

جروحي نايات وخلق الله بتعزفني ..

من الصوره اللي بهتانه أكيد من دمعي تعرفني

ويمكن لو هتمسح يوم على البرواز

تلاقي إيديا بتسلم .. تقولك هاي

أمانه تشيل معاك سكر لوجعي الجاي

وتزرع في العيون ورده تكون بيضه ..

تعبت أدارى من بختي

وارسم سجني ع الحيطه ..

ومش لايق على قلبي يبات مسجون بلا داعي .

كلمات الشاعر

محمود يحيى

Mahmoud Yehya