كوتشينة …

  كلمات الشاعرة 

عفاف أحمد التركى

كوتشينة …

خُدلك سيف ..وكمان سيف 

وارمي البخت في حضن رصيف

وانفح حلمك ..زي الكيف

وهات لي ..الواد

خد من عمري .. و زيد حكايات

زغلل شوقي في المرايات..واحسبها شقاوة 

فنط كل ايامي معاك ..واقسمها علينا

حمّلني علي كتف نصيب..

خدلك سيف.. واطرح لي حبيب

لسه مسافر جوه متاهة ..

طول ما السكة توّدي ..معاها

ومالوش مرسي..

بس عينيه ..بتفسّر روحي

كـ ابن سيرين..

خدلك سيف.. وابدرني حنين 

رشرش باحة العشق..وجلّي

وخلّي مشاعرك ميّة وطين ..

حِب .. وغنّي امان يالالالي..

خد لك سيف..و تعالي وقل لي

امتي الهوي يطرح عاشقين؟

امتي يبارك ..لمس حنينك

موج البحر .. يا جزري ومدّي

شطّك فاصل بيني وبينك

خد لك سيف..واحضني وعدّي

حواري مشاعري حافظة انينك

بتسمّعني ..

خدلك سيف ..ارجوك واجمعني 

وخد لك كومي..

هات من بكرة العمر يساعني 

وهات ألبومي ..

حاوي صورنا وصوت ضحكايتي

وشكل هدومي ..

خد لك سيف.. 

و غُز البُعد فـ ظهره يفرمل..

وسيب الدمع يفوّق نومى

    كلمات الشاعرة 

عفاف أحمد التركى