كلمات الشاعرة … يامنه اليمنى
يتوه الحلم …
ـــــــــــــــــــــــ
ويجرى العمر من عمرى
ويرسم فرحته عناقيد
يجمّع ضحكته فـ قلبى
لكنّ قلبى تملى عنيد
مابين الرّمش والنّنى
صبية جميلة متعايقة
بترسم فرحها وتزيد
بتحلم آه بجمال يومها
يتوه الحلم من نومها
وبين الحلم والفوقان
بتلقى القلب عاش هربان
وفـ النبضة اللى قبل الموت
تنادى الرب فـ الملاكوت
وتجرى تسابق الأيام
تلاقى الحلم يتاخر
تمد إيديها ع الأخر
تلاقى العمر بيهاجر
وتتشعبط فى ديل الليل
تلاقى النسمة بتدندن
بصوت مبحوح وقلب عليل
ودنيا هوان تلف… تدور
ولسه العمر متعشم
ومستنّى سنابل نور
تنوّر عتمة فـ دروبه
يلاقى العتمة مرفيه فى ديل توبه
تحاول تطلع الأنّات فتتحشرج
ومهما طالت المسافات
ملازمانا گـ ضل الروح
ياروح فارقى خلاص روحي
و شُقى عتمة مدفونه فـ سواد نوحى
ولمى آهاتى وجروحى
وحطيهم فـ قلب تابوت
وسيبى ذكرى م الأحلام
اعيش وياكوا انا فيها
برغم الموت
كلمات الشاعرة … يامنه اليمنى
Discussion about this post