السبنسة …

 كلمات الشاعرة 

 فاطمة علام

السبنسة …

ليه لما تسمع صوتي بينادي 

تقفل بيبان الحلم وتسيبني؟!!

وسط الطريق 

و بترسم التوهه !

وانا اللي جايبه بكرة بنهاره 

متعبي حضني 

الضي لقدومك 

مشاوير مشيتها 

السكه فيها ضباب

وف نن عيني الصورة مش واضحة

بهواك وراسمة الخطوة للقانا 

ولاهمني كرابيج هوا أمشير

في سبنسة الأحلام 

قاطعة لآخر الخط 

ومعلمه الأيام بصوت “ثومة “

غنيت معاها الأمل 

وزرعته في شراعي

مديت جدور الشوق وحقنتها روحي 

يادنيا ماتحني وارخي سنين العمر 

بكفايه شد الوتر

 ده اللحن مش مسموع

ياحلمنا المصلوب

إمتى تشق الليل ؟

سألت قرص الشمس 

 ليه الشعاع محجوب

 ضياه عني ؟!

وليه القلوب 

مبأتش تلمحني؟!

دانا اللي عاش محني 

جوا مدار دارها  

 دي فاتحة دوارها

 للكل إلاَّ آني

وازاي أجيب الصبح؟

 وطريقه بس منين ؟  

بالدمع كان الجواب… 

جف الندىٰ ع الورد وغصونه

والحلم نازف والجراح بتئن

مقطوف يابكرة وانت لسه جنين 

ومين هايسمع للنِدا ويحن؟!!

 كلمات الشاعرة 

   فاطمة علام

 أبلة فاطمة