((خمسين سنة))
وأهو لف عمرك بالزمن
خمسين سنة لما اتمزق
ورجعت تحسب في الساعات
وتوشوش الحلم القديم
وتلم كراكيب الأمل
طرقع في ضهرك واصلبه
خليك في نفسك مستقيم
ماتسبشى فضلة عمرنا
لو حتى كات متكركبة
متبعترة وسط الركام
وتبيع قصايدك للغريب
من غير تمن يعني ببلاش
إكتم لأصوات الوجع
إمسح حروفك ع السطور
قوم فضي حبرك في الكفن
وكأن وأدك للكلام
قبل أما يخرج للحياة
أصبح حلال
من غير فتاوى تكفرك
أو تلعنك من غير دليل
أو بيّنَه
إثبات براءتك مستحيل
لو حتى تحلف 100 يمين
هي عليك متفصلة
نصبت من جرحك إله
وبكيتله وانت في خلوتك
وكفرت لما لقيته تاه
ولعنت ضعفه وشكوته
قامت زعابيب الخريف
علشان بيبانك تتقفل
وتخيرك بين الفصول
نفض كفوفك
من سلامات العزا
واشتري جبر الخواطر
انت الوحيد اللي اصطفاك
ولا مرة فكر يخدعك
دايما بييجي في مخدعك
و يبل ريقك
دايما بيغسل فرحتك
ويفك ضيقك
إنت اللي واقف ضد نفسك
انت اللي عاكس خط سيرك
جَلدك لنفسك مش جفا
ولا تركها على حبلها
وفي غيها
هتبوح وتعرف سرها
من قلب حرب المهزومين
الفجر جاي خالي الوفاض
بيلم فرش المجروحين
بجناح كسيح
بيعلي صوت رفع الآذان
الكل في الضلمة
بيلضم في الهموم
وبيرسم الموت
ع الحيطان
وشك زمان كان القمر
وقت اكتمالُه
بيحب يتكلفت بشاله
لحد ما يروح هلال
حاول في دمي تنخله
وتصفي مني معظمُه
يمكن يتوب
كلمات الشاعر
وحيد علي الجمال
