بتضحك ليه؟!!
وايه ف الدنيا بيضحك؟
شبابك راح مع الأيام
وأيامك بتتمحك
ف عود مفتول ماهوش عودك
ف ورد جميل
ماهوش طارح على خدودك
ياعم خلاص …….
بدأ ليلك
يطفي ف ضي قنديلك
ومنديلك
من الأحزان بقى دايب
وشعرك شاب
وحلم العمر صار شايب
وقالها خلاص
ف وسط ميدان من الأحزان
ماعادش يا صاحبي ليك نايب
ونابك شاخ وعاد عاجز
يقول للقمة نتعارك
بتضحك ليه ؟!!
وايه ف الدنيا بيضحك ؟
بقيت مستني عكازك
يشد ف قطر انجازك
وانفاسك ماهيش قادرة
تقاوم ضعف احساسك
واحساسك بطول العمر بيضحك
*************
كلمات الشاعر
رضا ابو الغيط
