التجاوز إلى المحتوى
كلمات الشاعر
سمير محمود
قلبي العبيط …
بنخفي ف وجعنا ونظهر شُداد
كأن المشاعر ف حالة جهاد
كأن المظاهر ممثل قدير
وشارك ف فقرة ف حفل الرياض!
…
أصِحَّا ولكن في حالة صداع
بنزرع تلاقي ونجمع وداع
نآمن لعالم يبانوا جُمال
وهما اللي كانوا اساسا فُظاع
…
يوماتي بنبكي ونظهر تمام
ف جرح المشاعر مفيش التئام
تشوفنا تقولشي صخور من جبال
واحنا يا دوبك مجرد حُطام!
….
وكل اما نفتح لحد الطريق
لروحنا البريئة بيفضل يسيء
ف عز اما نشعر معاه بالحياة
ف رحلة حياته نموت بالبطيء
…..
ف قلبي مآذن بترفع ادان
وهما ف قلوبهم مدافع ميدان
ننادي عليهم ولكن مافيش
ماحدش بيسمع وعنده ودان!
….
وبرمي المزايا ف ايد العيوب
ف توب الاماني ماشوفتش جيوب
وبحلم بفرحة تزورني الآلام
ياريح السعادة وحشني الهبوب!
……
وبهدي ف طيبتي لناس بنت تيت
فبشرب مقالب ف حجم المحيط
ياإما الحكاية دي سؤ اختيار
يا إما المشاكل ف قلبي العبيط!
كلمات الشاعر
سمير محمود
