كلمات الشاعرة 

 چيهان أحمد النجار

قلبي الخضر …

============

ياخبر ابيض

على عيونه ولما يرن تليفونه

ولما الاقيه سايب لي رسالة فيها غرام

أنا بدونه باكون مش لاقية إحساسي

ولاعارفة مكان رجليا من راسي

ولا لاقية لصوتي كلام ….

ولما يقول وحشتيني بابيع الدنيا 

تسوى الدنيا ايه يعني هتبقي بكام ؟!؟

/واحس بقوة جبارة

وبعد ماكنت منهارة

بقيت وكأني في العشرين

نشاط حيوية ورشاقة….وفيه طاقة تهد الكون…  

وحشتيني/ بتعمل مني عفريتة

وممكن أجيب سبأ بلقيس 

وبارجع طفلة بشريطة

/واحس الكون بقي عيونه…

/واحس كأن انا خريطة  

وتلتين الحياه فرحة وتلت العمر من أحاسيس

وبابقي عاوزه أهد البيت..واعيد من تاني بنيانه

وازوق. أرضه وحيطانه

وارتب كل أركانه وأحط حنانه في الفازة 

واحط علي الكراسي ورود

وافرق ع المكان ألوان

صباح الخير/ اذا قالها كأنها حضن ولم اسكندرية ودوبها في حنان أسوان

وخلا الضحكة منصورة 

بتتباع فرح في الدكان…..

وحشتيني/ يابنت الاية…

لغة من ايه… 

حروف اتوفقت من سحر 

واللا اتكونت من بحر شعر….. وليه!

دا لما يقول وحشتيني/ 

بيبقي العمر مش ملكي

وملياش فيه

بتبقي حياتي ملك ايديه

ولما يقول حروف اسمي 

بيقع القلب من طوله ويغمى عليه

مانا يانن عين قلبي باخبي الحب م الدنيا

عشان لو عوزته يوم تلاقيه

جدار العمر لو ينقض…..قلبي الخضر.. مستنيه

    كلمات الشاعرة 

 چيهان أحمد النجار