التجاوز إلى المحتوى
الناس فصول …
كلمات الشاعرة
سارة زيادة
الناس فصول
فيهم بشر زي الشتا
تماثيل جليد
مفهومش روح
ليلهم طوووويل بارد بروده قلبهم
ولا فيش لحاف يفرد دفاه
ع الجته لما الريح تزيد
ف تبعتر الاحلام على طين الطريق
وناس كدا زي الربيع
تغمز بعينها
تتفتح الازهار على الوش الحزين
والضحكه ترقص ع الغصون
من فوق اماني الروح بتطرد كل جرح
تكنس تراب الحزن وتزيح التعب
ترجع تنور ضلمة القلب الصفيح
يصبح دهب
وناس ولا احلى
من الصيف الشقي
نظره عيونها فيها ريحة اليود
قلوب بطيبة أهلنا ايام زمان
رصيف كورنيش
بيلم كل الناس
بيوت و قصور
ع الرمله مرسومه بضحكة طفل
شمسيه ومنصوبه في عين الشمس
وموجه تحضن قلبنا بشويش
ترجع وتنحت صخرة الاوجاع تبوش
وناس كتير زي الخريف
أشجار بتسلخ جلدها
وكأنها تعابين كبيرة مفضَّضه
تعصرنا وتمدد ف شق الروح
تحمَّر القلب ف عيون الليل
وتدوقه ألوان شقا ومرار وقهر
وتأزأز الاحلام … نفوق
ويتوه ما بين العتمه مليون فجر
وكفوفنا لسه متبته ف خيط النهار
بتشد نور
تتفتح الشبابيك حياة
كلمات الشاعرة
سارة زيادة
