كلمات الشاعرة
سارة زيادة
لابسين مزيكا
……….. كماله يا بيه
نوتة أحزان مقسومه بينا
ناقصين جدا
والحزن لوحده مكملنا
الدمع اللي مشعلق روحه ف نن العين
ايده متبته
خربش على قلبي وسك الباب
عازف كداب
يبدر ألحان
…….. وينز عذاب
يفرح؟
طب ليه
حنكتف ايده قصاد رجليه
ونطوح فيه
في الدنيا يا بيه؟
دا بيانو قديم
وف كف غشيم
ح يدق نشاز
عواد والعود من غير أوتار
حيطلع ايه؟
طبال وف حضنه الطبله ستار..
جلدها كرمش
وصوابعه دي نار
لو يلمسها
حيطلع منها الصوت بيئن
ولا حد يحن
ويقول ب كفايه الظلم حرام
عصفورة بترقص جوه الكاس
ولا حد ف يوم حيمد ايديه يمسح خوفها
ويحلي المُر اللي ف جوفها
ولا واحد فيهم له عوزه
حبة دخان
طالعين من آخر صف هناك
تعميرة فحم على الجوزه
شياطين تتنطت جوه الراس
عواجيز بيبصوا ل أزأوزة
اراجوز بيلاعب اراجوزة
حيخلف بلياتشو وجوزة
عايشين اوهام
دابت جواهم كوم احلام
ولا يوم اتحقق فتفوته
حدوته الدنيا وملتوته
مفيهاش ولا مشهد حتى يشد
ولا له سوكسيه
كلنا… لابسين مزبكا
وكمالة يا بيه
كلمات الشاعرة
سارة زيادة
( لابسين مزيكا )
في الحفلات الكبرى يرتدي بعض الأشخاص زي الفرقة الموسيقية ويقفون مع العازفين دون أن يكون لهم دور في العزف.. مجرد منظر.. وذلك لرفع أجر الفرقة بزيادة عدد أعضائها. لذا يطلق عليهم في عرف الفرق الموسيقية.. لابسين مزيكا.
Discussion about this post