إليه

أنا القاسية 

كلمات الشاعرة 

وفاء على

وايه يعني اللي كان قواك 

ومين جابك ومين وداك 

وليه دلوقت مشتاق لي 

وحسيت إني عكازك 

ده أنا الحرف اللي كان مرسوم 

وأنا القدر اللي كان مقسوم 

ولو تكتب قصيدة ف يوم 

باكون الصورة ومجازك 

أنا وحيك وإعجازك 

أنا الصورة اللي مكسورة 

لكن لسه ف بروازك 

وجاي دلوقت تطمن 

وبتفسر وبتخمن 

حياتي إزاي بقت ماشية 

أنا اللي عشت رحالة 

وياما عاديت ف رجالة 

وعندك بس جيت راسية

أنا القاسية 

وأنا اللي صبحت ليك ناسية 

وبتعود على العيشة 

ولساني باروح برضو

في أي مكان جمعنا زمان 

وبطلب شاي مع الشيشة 

وبتخيل بإني معاك 

مانيش عايزاك ولا كارهاك

ولا بتمنى أكون جارك 

ولا ينفع نعود تاني 

وأكون بطلة لأشعارك 

يجوز ف القلب ليك حبه

مشاعر حلوة ومحبة 

لكن صدقني مش قابلة

تشوف الكسرة ف عيوني 

لاموني الناس على حبك 

وحاولوا كتير يقسوني

ف ليه دلوقتي بتدور

 وجاي تسأل حبيبتك فين 

حكايتك لسه مش واضحة 

وواقف لسه بين البين

وفاكر قلبي كان لعبة 

ف أرضك كنت انا عصفور 

رميت له كتير حبوب وبذور 

ولما خلاص بقا قصادك 

رميته ف ثانية بالنبلة 

أنا الهبلة وأنا الساذجة 

وانا اللي حاربت من أجلك

عاديت الكل علشانك

 وضحيت باللي كان قبلك 

راهنت الدنيا ياخسارة 

وطلعت برضوا دوارة 

خدتني مقص وانا ساهية 

صابتني ب 300داهية

وجابت ف التراب راسي 

لا يمكن تاني راح اصدق 

ولا هيخونني إحساسي

 ——————————

كلمات الشاعرة 

وفاء على