كلمات الشاعرة

 عفاف أحمد التركى

ماكانتش مشكلة القميص ..

انه رد الشوف ..

وماكانش باقي الصبر خوف ..

ولا انفتق صُبحك وعرّي المولوية..

وزّعت قمصانك علي..

 انثي وحيدة بتلهمك..

 فـ اتشكلت من نفخ صلصالك حروف.. 

واحنا يادوب آخر بصيص بيشِع ضي..

احنا تطويحة مددنا والله حي..

احنا الفراغ اللي اتحبس

 في الصدر قبل ما ننجلِي..

لو كان قميص بيرد شوف..

 فـ انا ذات رؤاك.. 

انا اللي ابهمت الرموز ..

و اللي حاجبة طلسمك..

ومفسّراك..

فبلاش تجاذف 

باللي فاضل منّي فيك..

وتجيب في سيرتي فـ اشرقُك..

ما انا وانت تحويجة حياة .

.وانا خفت وهمك ..يسبقك

 ..فـ احلمني…

 واصحي …

وانسي حلمك..

 وسيب عليّ احققك..

ريحة القميص كانت نبوءة مؤقتة ..

ما استوعبتش شوق نبي

يعني البشير اللي وصل 

غاية احتمالك فيا ..تاه

تبرد مشاعرنا اللي خمرت واستوت

تشبع مساكين الهوي 

فـ كل الحياة

اللي في روحنا اتكهّنت 

وبقينا اشبه بالجدايل اللي

قصّتها الظروف ..

انت وقميصك والمسافة 

وشِبر خوف 

اعمق من المعني المحرّم 

للحكاية المبكية 

شوفك بيصنع احجية 

يحكيها قلبك للعزيز 

يا مشرنق الخطوة المدد

وموصّل الريح ..

بالسنابك 

والجنود ..والصولجان 

صدقني،يا ابن المُلَهمين 

ماكانتش مشكلة القميص

دا كان ..كمين..

منصوب لقلبك من زمان .

……… ……. …… ……. …..

كلمات الشاعرة

 عفاف أحمد التركى