أغْلَى النَّاسْ…

إبتسام عبد الرحمن الخميري

اعْزِفْ عَلَى وَتَرْ قَلْبِي وُ رُوحِي رَدِّدْ حْكَايَةْ هَمْسِنَا يَا أَغْلَى النَّاسْ

إِنْتَ النَّغَمْ و القِيثَارْ تِبْرِي جْرُوحِي بِينْ ضْلُوعِي مَسِكْنَهْ أَرْوَعْ احْسَاسْ

اعْزِفْ خَلِّي مْعَاكْ نِحْلِمْ و نْطِيرْ نِفْرَحْ ولا مَا يْهِمْنِي آشْ ماشِ يْصِيرْ

وِ مَا نْخَافْ مْلَامَاتْ لا كْبِيرْ و لَا صْغِيرْ مَا دَامْ إِنْتَ مْعَايَا تَدْبيرْ التّفْكِيــرْ

                     + + +

اعْزِفْ لِيَّ و قُولّْي أَحْلَى الكَلَامْ غَذِّي رُوحِي غَذّي ما يِهِمَّكْشِ مْلَامْ

حُبِّنَا حُبْ حَقِيقَهْ مَا هُوشِ أحْلَامْ بصِدْقْ الأحاسيس لا هو في أَفْــــلَامْ

تْسِيلْ عَلِيهْ مْحَابِرْ تفيض معاه أَقْلَامْ في مَجْرى التَّارِيخْ عامْ يحكي لأَعْوَامْ

                    + + +

اعْزِفْ لي يَا رُوحِي و آنَا بيكْ نْغَنِّي والرُّوحْ الوَلْهَانَهْ أشْكُونْ أسْعَدْ مِنِّي

في بَالِي مِرْتَاحْ و القَلْبِ المِتْهَنِّي الحلوة في اللّلَّاتْ صغيرة وغارتْ مِنِّي

اعْزِفْ خَلِّي النَبْضَاتْ في قَلْبي تِتْرَاقِصْ مَا دَامْ إِنْتَ فِيَّ شَيْ مَا عنْديِ نَاقِصْ..

 ………………………………………

إبتسام عبد الرحمن الخميري من تونس