حصاد أيام
حطام أحلام
رماد شايلاه في شنطة إيد
و لوحة كنت رسماها برومانسية
لبيت دافي و قمر سهران
و قلب مآمن الدنيا
و باب غرقان تمللي
بريحة الياسمين
***
و كات تحلى الليالي معاك
نتسامر و نتحاكى
في أحوال الحياة و الناس
و نقرا لبعض أشعارنا
و نتناقش في افكارنا
و نتقاسم سوا الضحكة
فتتحول أهات الست في السهرة
لترنيمة فرح و سرور
لكن فجأة دخل مجرم
و طفى النور
و سرق الورد م اللوحة
و رش الحزن عالجدران
و ساب كل الاماني بور
و فجأة البيت صبح مهجور
ما كانش حرامي ابن حلال
يسيب لنا وردة في اللوحة
يسيب لنا حتة م الاحلام
لكنه حرامي ابن حرام
سرق عمري و أحلامي
و عكر عاللي جاي قدام
و ليه و ازاي
حكم على قلبك المحتاج ونس روحي تكمل رحلتك وحدك
غريبة دمه من دمك
غريب العالم الغابة
ما فرق بين حلال و حرام
و نازلة ستارة المسرح
و انت هناك
برغم الحزن بتسامح
ذئاب نهشوك بقلب ملاك
برغم البعد انا سمعاك
بتنده لي : وحشتيني
تعالى خديني من أسري
لبراح قلبك
سامحني ايديا مكتوفة
و مش طايلاك
و راجعة وحدي م الرحلة
مفيش في جيوبي غير الٱه
و دمعة في قلبي كتماها
بتبعت شكوتي لله
كلمات الشاعرة
حنان شاهين
Discussion about this post