شايف على سطحك شجر
كلمات الشاعر الناصر صلاح الدين
شايف على سطحك شجر
أخضر خضار السندسة ..
.. طلعة نهار بالهنا
لامس ضلوع شمس وقمر …
.. ينده عليك قرب هِنا
إزرع حياه على شطنا ..
.. نهرك مَدَد
حضرِة فَرَح .. ليلة غُنى ..
.. معازيم كتير م الأوليا
والعارفين ..
.. ضلة فرج
زهر فى فروع السوسنة ..
.. انت العباية مهفهفة
نسمة ربيع ع الحرانين ..
.. وانت الأمل للشقيانين
و العرقانين …
.. المشتاقين لقمه وغطا
قوم يابطل ..
.. لف فى مقام سيدنا الحسين
والسيدة ..
.. صاحب دموع الساجدين
سجدة صفا متجدده ..
.. حمد ورضا
باين قوى فوق الجبين …
.. إكرم إيديك
وافرش لهم فرش و غطا ..
.. وانعم بدعوة مأمنة
من صوت مديح المجزوبين ..
.. عَلم فى قلبك بالقلم .
.. صفحة كرم ..
.. لله جنود متعينه من ربنا
يبقوا الخدم ..
حظك كدا .. يستخدك ويكرمك
تبقى الأمين ..
.. إسمك بقى نسر فى علم
تصبح إمام المحسنين …
.. صبرك جمل
شق الطريق وسط الجبل ..
.. عرقك عسل
طب ودوا فيه الشفا ..
.. للمجروحين ..
.. سكه وطريق رحلة سفر
زى اللى هايزور الحرم ..
.. هايم فى ضل المصطفى
سعى وطواف ..
.. تسبق خطاك الطوافين ..
ياسنبله لونك طحين وقت العجاف
خبزة نجا .. للمحرومين
مركب وطاير بجناحين ..
.. فضل ونعم ..
.. شلت الأمانه فى شنطتك
.. ورسمت صورة لضحكتك
رحمه و ورع من قلب أبيض متقى ..
.. معدن أصيل حُر ونقى
يحضن يتيم قلبة إنكسر ..
.. كسرت عيون المحتاجين
ياجدر طالع فى الأراضي الطيبه ..
.. فَرَع و طارح ع البيوت
للرحمه سكه قريبه ..
.. تفرح بدبة خطوتك ..
وتأمنك ..
.. دعوة غلابه وطيبين
… حظك كدا
إسمك بقى نسر فى علم ..
.. مركب وطاير بجناحين
فضل ونعم ..
انهض وقوم .. قومه فرس
حافظ خلاص كل الطرق
عارفك شديد وقت المحن ..
.. دايما بتكسب فى السبق
عارفك عفى عمرك معاند ف الزمن ..
.. عارفك غيور دايما تثور
لأجل الغلابه وحقهم ..
تسمع دعاهم بالشفا ..
.. والدعوه دمعة قلبهم
انت الحقيقه فى حلمهم ..
كلمات الشاعر
الناصر صلاح الدين
Discussion about this post