يوليو اللقاء
يوليو اللقاء
وف آخر الليل ( الذي )
بيضمنا بالروح
سأل المعذب بالغرام
قلب البنية البوح
كان قلبها لساه
بيبدأ يعزفه
محتاج عيونه تشرحه
محتاج دوا
ما الداء جروح
كبرت ما بينهم
كل أوقات الأمل
واتوحدت الأحلام
غصنين زمان
كبروا سوا
شربوا سوا
من ساقية واحدة
وأرض واحدة
وسمعوا ف الفجر الحمام
بيردد الشعر اللي بينهم
وقتها
تضحك عيونهم
لما يجي الرد
ما فيهوش اختلاف
كان ائتلاف
سلمنا ليه
حنينا ليه
حسينا يومها بانسجام
مين أفتى إن الحب
درب من الجنان
لو يوم يعدي
ماكنش فيه صوت اللي بتحبه
أو فهم خاطئ إنه بيصده
أو ربما
مابقاش ينام
مين اللي أفتى إن الشجن
لايق على النهايات
كل القصص كانت ما بيننا
دي كلها بدايات
حتى اللي فات من عمرنا
وكأنه يوم عمره ما فات
يا لمسة الدنيا البريئة
على الجبين المبتلى
يا ضحكة الجنات
يا كل آمال الغصون المغرمة
لما يرقصها الهوا
فتدوب حنان
تتلاقى و تفوت النوى
و دهشة البدايات
يا أول التوقيت
و مفتتح الهوى
يا آية بتصبح على
كل القلوب التايبة م المسافات
إن كان يقيننا ف اللقا موجود
مدي إيديكي الطيبة بالجود
خليني أتمم جملتك
من غير فواصل أو حدود
ما انا كنت ف الملكوت خبر
وساعتها كنتي المبتدأ
متصدرة قلبي
قاعدة على العتبات
مين اللي قال
إن الخبر أنواع
دا انا قلبي كان
شبه الألف واحد
فنار ف ليلك
مهما كان جاحد
قلبي شبيهك ف الرؤى تفاصيل
مفطور و ذنبه ف العيون بيميل
يا مأمنة ع الوعد توبي
اتكي ع الأيام و فوتي
يا طيبة
يا جاية من حضن الوجع
اتصبري بالروح
و دوبي ف الجدع
و سطري روايات
أصل الأهات متفصلة
على قلب كان مهزوم
وأنا عارفه قلبك
دام برئ معصوم
غنى الحياة من منطقك
و اشتاقي يوم
كوني اللي عاوزاه و امسكي
كل النجوم
يا بدر و الأيام سما
خطك دا فاصل بين هناك
و طريق هنا
ابقي ( اسلكيه )
فلربما
كلمات الشاعر
محمد خليفة
Mohammed Ahmed Khalifa
