السكك سراديب
يابحر هدي الموج ، غضبك مالوش داعي
معايا ليه معـووج ، وكسـرت لي دراعي
أنا عيشت فيك بحار ، ومراكبي حـدافه
النوه خـــــــوافه ، حاسب على شراعي
………………….
إحسب خطاوي البشر بالألف والملايين
فيه ناس بتاكل ظفر وناس بتاكل طين
مع إن خـير ربنا ، لو وزعـوه بالعــدل
هايكفي كل البـشر ، ويشـبع الجعانين
الخـير كتير إنما ، بطـن الطمــع بلعاه
الجهل شب ونما ف الضلمه يرمي أساه
نور اللنض قايد ، بس السكك سـراديب
وخوفنا زي الديب ، دبح الأمان وتواه
ــــــــــــــــــــــــــــــــــــــــــــــــــــــــــــ
كلمات الشاعر
معوض حلمي الفلاح الفصيح
