الحلم …
“الحلم”
عايش شبابي حصان جامح
كتاف عفية وقلب جسور
ما بحبش أفكر ف إمبارح
ف السما طاير كما النسور
تربية أبويا ومن عرقة
لو ميه وملح وعيش تنور
عارف تعاليم ديني كويس
وبحب الحق وكاره الزور
بصلي الفرض تملى جماعة
أدخل ف الضلمة تتحول نور
سكتى دايما سالكة وواضحة
أمشي فى الصحرا وأعدي بحور
وأمي بتفضل تدعي لي
وماشية ورايا ترش بخور
كنت أنا ليها ف الدنيا الحيلة
دعيالي دايما أعيش مستور
طالبة تشيل بايديها ولادي
عايزة تسمي رحمة ونور
وأنا ف الحلم يجينى ليلاتى
أن انا سكنى جوه قبور
ويوماتى أمى تجيب لي عرايس
وعروستى طلعت عروسة من الحور
كلمات
الشاعر: حليم محمود أبوالعيلة
مصر
