ختم ضمان …

 كلمات الشاعرة 

فاطمة علام

(ختم ضمان )

بيسألني هاتدفع كام 

ف قلب قديم ومتحمل 

عذاب وهوان 

 وواخد خمسميت طعنة 

فراق وخصام  

وإيه قول لي اللي يجبرني 

 ياصاحبي عليه ؟

وإيه لسه اللي فاضل فيه 

عشان اهواه أو أدفع فيه

اكيد م الغرام دايب 

ودقاته بكا وأحزان 

وجوفه م الهوان شايب 

وأصبح م اللي شافه حطام 

أنا لو منك اسمحلي 

بصراحة ارميه 

أنا فعلا صحيح باحلم 

ونفسي ف قلب 

لانج وخام 

 يكون لسه بلا استخدام 

جديد لسه بكرتونته 

وليه ماركة وختم ضمان 

لاشاف الغدر وعذابه 

ولا خان مرة أحبابه 

ولا يوم باع

يادوب خارج من اللفة 

سليم لسه بدون أوجاع

لاداق الحب ومراره

 ولا اتفاجئ بأسراره  

لاخاصم يوم ولا فارق 

ولا مرة صدق واتهان 

وده المطلوب بأوصافه 

وقول لي لو هاجبهولك 

هاتدفع كام !؟

 كلمات الشاعرة 

فاطمة علام

أبلة فاطمة