كلمات الشاعر
محمد المصرى
“ماتخافيش”
ياللي صوت الآهة منَّك
زي أنّة ١٠٠ حزين
د نت كل ما تيجي تفرح
يترسم ف الكون أنين
يتغزل بدموع ملايكة
تتحسب بيه السنين
توجعك كلمة بحبك ؟!
راح اقولها مرتين
مرّة لجل ما قلبي يهدى
مرّة لجل البصاصين
اللي شايفين إن حبّي
لازمه والله تصيبه عين
توجعه وتنزف دموعه
تقتله بين ليل وعين
تخلعه من بين ضلوعه
تجعله م المجروحين …….
أيوة بحلف باليالي
وبسنين الشوق يا غالي
باللي صورته ياناس قبالي
وبإلٰه العالمين
إني اداري الشوق واخبي
إني أكونلك ويّا قلبي
والحنين المستخبي
عشرة غالية من سنين
مانتَ عارف اللي بية
مانتَ روحي و نور عنية
و أنت كل الدنيا ديّة
بَعدك أنت أعيش لمين
أصل جرح الدنيا كله
جنب جرحك مايساويش
وإن وعود الدنيا ماتت
جوة قلبي راح تعيش
سيبك أنت من اللي حاسد
واللي كاره واللي حاقد
سيبك أنت من العوازل
خوفك أنت من مافيش
واسمحي للقلب إنه
جوة قلبك يوم يعيش
ماتخافيش.
كلمات الشاعر
محمد المصرى
Mohamed El
Mohamed El Masry
Discussion about this post