كلمات الشاعر 

هانى البوب

من أول السطر الأخير

بكتب كلامي المُختصر

من كل معنى و لون .. يسير

كل الزعل لما احتضر 

و يموت ف اوقات ليل جميل

أو تحت حبات المطر !

يحضر وداد ..

حب .. و بلاد

فيها البلابل و السمر

و بقول كمان وقت البيان :

أنا بعتذر بدموع تبان ..

بالحب و الشوق و السهر

و الصمت من قبل اللِّسان

و بلاش يكون بيننا الزعل

و بلاش يكون بيننا الخصام

لو قولت كلمة بتجرحك

بسحبها من بين الكلام

و ارميها ف البحر الغويط

أنا قلبي عاش .. مِنك يريد

كل السماح ويا الرضا

و هواكي يتحول ربيع 

و ف ثانية يسكُن قلبي يوم ..

فيدوق أوام دقات .. وديع ..

و ازاي يضيع بيننا الكلام ..

و العشِرة تصبح كالسقيع 

مافهاش دفا ؟

و ازاي يموت ورد الوداد

لما بخيوط شوقنا اترفى 

أو لحظة يدبل كالشجر ؟

لو كلمة مِني تجيب مزبد

من كل أوجاع البشر

أو قولتها لقلبك فدمَّع و انكسر

فبقولها بالصمت المُباح 

و الهمس و الصوت و النظر :

أنا ليكي بالشوق و البراح و الحب و الروح ..

بعتذر !!

كلمات الشاعر 

هانى البوب

بالعامية المصرية