انا عايش مش ميت …

كلمات الشاعر
وحيد علي الجمال

و فجأة لقيتني ف العتمة
بقيم وشي و بالعافية
وبتكعبل مع نفسي وبتكفى
وقلبي نبضة جوايا ومن رعبة
عامل زفة
و بصرخ حد يسمعني
و لو حتى يطمني
منش شايف كفوف ايدي
و لا رجلي مع الجزمة
اكونشي عميت كدا فجأة
و تهت ومت م الخضة
وجوف القبر وحيطانة
بتعشق صحبة الضلمة
لكن واقف انا لسه وبتحرك
ولبسي هو ذات نفسة بتفصلتة
وساعتي لسه بتكتك
وفي جيوبي اللي كحيانة
شوية فكة فرحانة بتتنطط
انا عايش مانش ميت
صحيح العيشة تشبهله
في راحت البال مافيش زيه
و بحلم حلم مش قده
كابوسي نام في اوجاعي
و مستسلم
ومش قادر يحركني
كأني مت مش اكثر
بخبط لسه فوق صدري
وبتنفس
شوية وخلقي هيزيئ
وقوم واشتم وهتنرفز
مسحت بتوبي نظارتي
طارت مني وجات نصّين
فرط دموعي في خدودي
وقلت امشي كمان سطرين
ابحلق في الطريق يمكن
دليل يظهر يوصلني
حيطان الناحية مرسومة
و شوش عفاريت بتتحرك
شعورها شوفتة بعنية
جبل منكوش
وشق كبير طالع منه
لسان مشقوق
وعين عمالة بتراقبك
في طاقه كبيرة مقفولة
في قلب النور
وقولت اقرأ بقى قرآن
عشان اهرب من الغربة
على الجانبين
آيات الخوف راحت مني
وانا محتاج أرددها لو آيتين
خبط في واحد اسم الله
طويل واعرض كدا مني
كأنه اثنين
مسكته وقلت طمني
ايه القصة
ياصاحبي الخوف هيقتلني
ماتقلقشي
وطبطب فوق على كتفي
حكومتك عاملة برنامج
وخطة كبيرة للترشيد
هتقطع نور شوارعنا بالترتيب
عشان الخدمة تتحسن
ونتمكن من التوفير
فلازم يوم تضلمها
ونمشي فيها ونحسس
ونطوح شمال ويمين
د يوم اثنين مهش فارقة
د وقت بسيط
واصل الناس بقت ناقصه
هباب الطين
ع الناصية
هالاقي كام واحد واقف
بيتبلطج يهددني
وياخد كل شئ مني
يااما في مرة يقتلني
ويتهجم على بنتي
ويضربنا و بالمراكيب
حياتنا كلـّها باظت
واخلقنا بقت كراكيب
وبتلومني عشان نفسي
ولو مرة تكون لي كرامة
تسترني
نعيش فيها سواسيه
مافيش فيها أمير وغفير
حقوقي فيها تحميني
من التهميش
ودمي يسيل على ترابها
وانا راضي نربي فيها وأولادنا
واحفادنا عليها تعيش
يااجمل ارض في الدنيا
انا رافض فيكي التهميش

كلمات الشاعر
وحيد علي الجمال