علّمني إزاي …

علّمني ازاي

……………

كلمات الشاعرة   مرفت جابر

حبّك علمني حاجات ياما

علّمني ازاي افرح دايما

وازاي الضحكه تكون ضحكه

أضحكها وتطلع من قلبي

والليل لو عدّى على السكه

علّمني ازاي ارمي إشاره

للنجمه أوام تنزل جنبي

وازاي لو قاعده وسهرانه

أنده للقمر المتعلّق

ف الحال يسامرني ويصاحبني

أنا كنت صحيح جاهله ولاكن

وحياتك حبّك علّمني

إنما ف دموعي ما علّمنيش

إزاي اتحمّل ف بعادك

وازاي القلب يدق يعيش

ويشوفك سايق ف عنادك

أنا كنت التلميذه قُصادك

وغرامك علّمني ولاكن

كان برضه علامك فيه تقصير

فرحانه كتير

مجروحه كتير

ومشيت مسنوده على خيالي

وانا شايله دموع العين مشاوير

ما انكرش اني اتعلّمت حاجات

كما حلم انما ..

ناقص تفسير

ربما كان قِلّة بخت معاك

كان قلبي بيجري تمللّي وراك

يتعلّم منّك وبينهج

قلبك استاذ وما علّمنيش

غير بس يادوب نص المنهج

علّمني صحيح افرح ويّاك

وازاي اتحوّل عصفوره

وأرفرف بالجناحين ف سماك

علّمني اتحوّل حور العين

ف عيونك لمّا تجيني ملاك

وازاي الليل افضل قعداه

باستنّى خيالك ف الشباك

إنما بالفعل ما علّمنيش

لحظة ما بهجرك تدبحني

إزاي انساك

كلمات الشاعرة

مرفت جابر