للصـبـر حــدود …

كلمات الشاعرة …
إيمان عبدالله والى

للصبر حدود واسمع منى
القلب اهو شال ومجنني
ان كنت فيوم صبرت عليك
اهو جيه اليوم تبعد عني

القلب مال قولت وماله
اهو حب العمر وراس ماله
لكن تغلط وكمان تظلم
اتحمل ليه كده افعاله

قولت المال مابيبني رجال
قولنا نعيش ع قد الحال
لكن غادر وكمان خاين
يبقي وجودك بحياتي محال

قالي دى نزوة وهتعدي
بلاش ثورة وكمان اهدي
هبعد عنها شهر اتنين
ادينى الفرصة يلا وعدي

بكلامه كان بيسجدني
هيغير حاله ويوعدني
واتاري كلامه كله خداع
وعشان المال بيهددني

بيقول لو يوم كنت هفارق
انه يقتلني وما يفارق
اصلي ف بحور الشوق غرقان
ولا عمرك يوم هتكوني طالق

لو صان الود كنت راضيته
واغرف من حبي وسقيته
يغرق في بحور مليانه حنان
وزهور الحب تعطر بيته

لكن قلبه فاتحه لوكاندة
وانا عارفه علاقاته الجامدة
يمكن يعقل يوم ويتوب
بس المرة ادى انا معاندة

اسمع منى اخر الكلام
بطلت اعيش انا بالاوهام
عاوز تبعد فك سراحي
وابعد خليني اعيش بسلام

غلطة حبك كانت مني
وهصلحها رغما عني
وان جيت فيوم تترجاني
فرصة سعيدة وابقي قابلني