وبرغم الضحكة المتفائلة
وبرغم الضحكة المتفائلة
والكلمة والحرف الطيب
بيقولوا إنى مش قابلة
لا غريب أو حتى قريب
والله أنا بضحك وبغنى
والحرف بيرسم ويلالى
لكن من جوة أنا متغمى
وبتمنى الدنيا دي تحلالى
بحاول دايما أتعامل
على أد الموجود ف الصورة
بتكلم مع كل الدنيا
وبحل ولا 100 فزوة
وبسابق دايما بالضحكة
الحزن لو قرب منى
وبقوله إبعد وحياتك
وبلاش للوهم تسلمنى
دانا لسه بحاول أتعلم
اقرا الأفكار والمعتقدات
وبغالب ف الأيام وأكتب
عن بكرة وعن الرغبات
دانا بعمل م الأحلام دنيا
وبعمل من قلبى سلالم
وبكابر ف الخطوات لكن
بتأنى وربنا بيا العالم
بتكلم دايما مع روحى
وأحكيلها عن كل أحلامى
بتقاوح هى وبتكابر
أو تتنازل وتقول حاضر
بسألها يدوب عن كراستى
وأقلامى وحتى السبورة
واسألها عن حلم قتلته
وكام واحد كانوا ف الصورة
بسألها كام مرة عشقتى
وكام حد طبطب على قلبى
بتجاوب أسكت يا مغفل
ماتبطل بقى تحكى وتسأل
القلب النابض ف جنابك
كان خايب أوى من أولها
كان دايما يمشى ويتكعبل
والخطوة الحلوة يأجلها
لحد ما شعرك صار شايب
كان فكرك الدنيا بتاعتك
الدنيا دايما بتسابق
وبتدى للى يعبرها
ف اتنيل بقى واسكت خالص
وأيامك الباقية جملها
بحروف من شعر بيتغزل
ف جمال الآخرة وتأويلها
سيبك بقى من أحلامك
أحفر لها قبر…قوم إدفنها
كلمات
الشاعرة عزه السعدنى
رفعت للتصميم
