نسجت أوجاعك

نسجت أوجاعك خيوط وغزلت حبل المشنقه
وحلفت تستبدلها موت ولا يسلبوك لحظة لقى
مسكين يا وارث طبع ابوك
من بين ضلوع الموت جابوك
طب ليه غواك طعم السكوت
وانت اللي غاوي الزقزقة
لفت خيوط العنكبوت
حول المدار
قال اللي لابد في التابوت
الموت قرار
لو كان صحيح الموت قرار
كان ليه خيار الإنتحار
وانت يا نن عيون أبوك ما دقت يوم طعم الشقا
لو يوم صحاب السوء خانوك
فضفض يجوز تلقى الصدى
عند اللي فاضل من أبوك
لو نقطه من أبعد مدى
لساني سامع شكوتك
الموت مكلبش خطوتك
وبرغم كون الكون براح
لساك أسير الشرنقه
رغم انحسار
المد في بطون البحار
رغم انتحار
الضي في عيون النهار
رغم افتراق الملتقى
الشمس شبعت شقشقه
صحصح بقى
………………………….
كلمات الشاعر
سلامه ابو النجاه