التجاوز إلى المحتوى
كلمات الشاعرة
وفاء على
لسه فيكِ حيل تعافري
لسه واخدة العند غية
لسه برضوا فاتحة قلبك
للغريب زي التكية
لسه شايفة الدنيا وردي
والعيون لامعة وشقية
لسه بتصوني الجمايل
لسه باقية ع الوعود
للي خاين واللي بايع
لسه ماوضعتيش حدود
لسه فيكِ الطيبة باقية
وابتسامتك هي هي
لسه جوه الكف راسمة
م الوجع مليون طريق
لسه رغم الضعف شايفة
كل شيء ف الكون بريء
لسه سايبة عينيكي قشة
للي ف الاحزان غريق
لسه صالبة الطول وشايلة
م الامل مليون وقية
لسه فيكِ حيل تعافري
لسه واخدة العند غية
لسه رغم الضعف ظاهرة
للصحاب صلبةو قوية
لسه بير أسرار لأهلك
لسه حمالة قسية
لسه بنت بألف راجل
صاحبة جدعة تساوي 100
لسه فيكِ حيل تعافري
لسه واخدة العند غية
ــــــــــــــــــــــــــــــــــــــــــ
كلمات الشاعرة
وفاء على
