التجاوز إلى المحتوى
كلمات الشاعرة
د. وفاء بغدادى
اللي شفته من عينيك كان حد تاني
حد ما بيزرعش حب
حد بايع وف ثواني ..
كان مخيف كان ضعيف
كان وغصب عني اقولها
كان اناني
حد شككني في ملامحي
حد بيقطع في جرحي
كنت بزرع قلبي حب
ليه عشانه
هد روحي زود الاحزان مكانه ..
قلبي بعده وعد راح يقفل بيبانه..
والباقي مني هتلاقوه من بين سنانه..
كان ملاكي
قال لي كل الكون فداكي..
جاب لي ورد من ايديه
كل احلامي ف عنيه
قال لي مهما الدنيا تمشي
قلبي ساندك
قال لي مهما الكون يعاندك
قلبي عندك
شفت نفسي عروسه حلوه من كلامه
شفت نفسي طير وطاير من سلامه ..
شفت ناس فرحانه بينا
شفت وعد كان مالينا ..
بس لما جه ينفذ كان حد تاني..
كان مخيف..
كان ضعيف..
كان غصب عني اني اقولها
كان اناني..
كنت منه
اه كنت منه ،.
كنت بحلم لو اشيل الحزن عنه..
ما اعرفش انه؛
راح يجي يوم
واكتب قصيده غصب عني
اسمها ..
انا خفت منه
انا خفت منه
بس بكره
السما تحكم ما بينا ..
والنجوم
توزن الدموع في عينا..
هتلاقيني في حزن اكبر
اصل انا حبيته اكتر
كنت برده صادقه جدا
صادقه اكتر ..
بس انتهى مع خوفه هو
وخفت اكتر خفت منه
كلمات الشاعرة
د. وفاء بغدادى
من ديوان افتح صفحتها بعد الموت
