التجاوز إلى المحتوى
قلب حجاره …
كلمات … مرفت جابر
…………..
عمري ما كنت ف لحظه اتخيّل
إن القلب الي انا حبّيته
يكسر قلبي
وقلبي يهون
عمري ما كنت ف يوم اتخيّل
إنُّه يبيعني
أو يخدغني
أو على قلبي يدوس ويخون
صعب اكون الورده الصابحه
اللي ف عز الشتا والنوّه
برضه عبيرها يغطّي الكون
صعب أعيش العاقله ودايما
باتكعبل ف طريق الدنيا
وباقابل عالم كلّه جنون
بيدوس فوق القلب الطيّب
وبيقطف أوراق الورد
أو بيقابل إيد ممدودة
بخناجر وجبال الصد
مش ح اتحمّل قلب طبيعته
كل ما اقرّب ..
بيزيد بُعد
صعب أوزّع دفا ع العالم
وانا باتحمّل وحدي البرد
والقى الشوك ف طريق الخطوّه
وانا ف شوارع قلبي الطيّب
زارعه نخيل وسنابل ود
صعب ابنيهم وانا باتهد
واصرخ من جوّايا بوجعي
صرخه يخاف من صوتها الرعد
وانده مالاقيش حد يرد
وكأن الدنيا بتتحوّل
والعالم بقى كلُّه أصم
مش رح اصب الشهد عشانكم
واشرب وحدي كاسات السم
مش رح الّم النور ف الضلمه
طول م العالم عالم أعمى
ح ابني جدار وح اعلّي السد
ومادام القلب اللي عشقته
قلب حجاره
ح امشي مع النفس الأمّاره
وح اسيب المعبد ..
يتهد
……………………………
كلمات الشاعرة
مرفت جابر
