التجاوز إلى المحتوى
كلمات الشاعرة
وفاء على
أنا عكسها …
دخلت أفتش عندها
وسط الصور والمنشورات
وقعدت أدقق بالساعات
وأشوف ملامح وشها
وقت الزعل وقت الفرح
وكمان طريقة لبسها
مين جنبها
مين من صحابه يكون
قريب منها
ماعرفش ليه خدني الفضول
إني اقرأ كل التعليقات
يمكن تجيني بشارة منها تبل ريق
ماكانتش أصلاً تنفعه
ولا حتى كانت بيه تليق
الفرق كان واضح أوي
لكنه كان بيحبها
وبدأت أفكر من جديد
أنا ليه باقلب ف اللي فات
وبافكره بالذكريات
مع اني باتعصب أوي
لو مرة ينطق إسمها
ممكن أكون حاسة بفروق
ممكن أكون باخاف ف مرة يجيله شوق
يرجع ويسكن حضنها
مع كل مرة بنختلف
يملاني خوف
عارفة ان بعده اكيد عشان
غاصباه ظروف
وبخاف أوي من قسوته
وبقول أكيد هي السبب
ماهي خدعته
وارجع واقول
طب ليه يآخدني بذنبها
مش شرط يعني اكون كوبي
أو نسخة تانية منها
انا عكسها
كلمات الشاعرة
وفاء على
