الشاعر / رضا ابو الغيط
والشاعرة / سميرة محمودي
يانهارك زي الطين
________________
الشاعرة سميرة محمودي
يانهارك زي الطين
راجع وايديك فاضيين؟
ولاجبت الخاتم برضو
ولا حتي الاسورتين
رضا أبوالغيط
مش عارف ايه اللى جرالك
ومغير دايما حالك
على طول بتخلى نهارنا
أسود م الليل الحالك
سميرة محمودي
وانت بتسمع وتطنش
وكاني باقول الغاز
اول ما باقولك جيبلي
تعمل ناسي يا استاذ
رضا ابو الغيط
انا قلبى عمره ما قصر
ولا نن عيونى ياروحى
وبلاش اشكيكى وأفسر
لأزود دمع جروحى
سميرة محمودي
قلبك شكله ما بيحسش
ولا شكلك ناوي تعيش
طلباتك عندي اوامر
واطلب وتقولي مافيش
رضا ابو الغيط
من يوم ما القلب اختارك
مش شايف غيرك شمسى
وانتى بتزيدي مرارك
ف كاسات وزكايب أمسى
سميرة محمودي
هأهأ ضحكت عيوني
يا بخيل اكدت ظنوني
هاعشق غيرك وهاسيبك
وهاعيش للي بيدوني
رضا ابو الغيط
اعملك ايه ما تقولى
وانا هادد حيلى وطولى
علشانك وعشان بيتنا
وانتى بتحبى عازولى
سميرة محمودي
اتلحلح بقا واصرف لي
كام الف يفكو الضنك
اكتب لي الشقة باسمي
واعملي حساب ف البنك
رضا ابو الغيط
الفقر ده عمره ما كان
بيعيب أبدا انسان
والحق على اللي اتغير
وبيحلف أنه ماخان
سميرة محمودي
وعاملي فقير غلبان
وانا شايفاهم بعيوني
وياك ملايين يا منيل
ولا سأل في اللي جابوني
رضا ابو الغيط
انا كنت شموع قنديلك
ونجوم بتنور ليلك
وانتى مش حاسة بحبى
وتملى تقولى يا ويلك
سميرة محمودي
وهاحس بحبك ليه
واناخدت ف حبك ايه
خلتني احس بفقري
واحلم بالنص جنيه
رضا ابو الغيط
روحى للى انت عشقتيه
علشان قرشين ف ايديه
واختارتى تبكى عيونى
والحب تدوسى عليه
سميرة محمودي
انا ادوس ع الدنيا بحالها
علشان مصلحتي يابيه
وانت لا قاضيلي مصالح
ولا حبك هابكي عليه
رضا ابو الغيط
د اللى هيبعنا نبيعه
وخساره تحايل فيه
وف يوم هيولى ربيعه
وخريفه هيقسى عليه
سميرة محمودي
طلقني قوام وبسرعة
واديني حقوقي وروح
دا المليم اللي ف ايدك
يطلع بطلوع الروح
رضا أبو الغيط
طب روحى وانتى خلاص
فرجتى علينا الناس
وخساره فيكى يا سمره
قلبى المليان احساس
Discussion about this post