ألبوم صور …

كلمات الشاعرة …أمل جراد

ألبوم صور
إتركن ع الرف
فيه الابيض والاسود
وفيه كمان الوان
نفس الوشوش
نفس الاسامي و الملامح..الالبوم ست صفحات
الصفحة الأولي امي وابويا ….متصورين صورتين ابيض واسود ….الضحكة باينه. ب أمارة السنتين
والغمازتين
من غير احمر واخضر
ياعيني واللهي منورين
الصفحة التانية
كنا جينا للدنيا
ابويا شايل اخويا وامي شايلاني
وكنا بدأنا ف صور الوان بس تحس أننا
من غير زيف ولا رتوش …هي هي نفس الوشوش
الصفحة التالته والرابعه كانت العيلة
اتصور الكل لمه
وفجأة اتغيرت الملامح …..جريت السنين بقينا لينا حياة
الكل ف الدنيا سابح
الالبوم عايزين نملاه
قبل ما يفوت الزمن
خلاص الكل انشغل
ندور علي بعض لقينا
عدي بينا الزمن وبقينا نتحجج
اتغيرت الملامح والصورة بقت مصنوعه بنضحك غصب واللي يدور وشه قصده رفض
اتاري الزمن حفر فينا
ملامح تانية
ضاعت اللمه في ثانية…..
الصفحه الخامسة والأخيرة
العيلة بقت في حيرة
مفيش لمه
مفيش ضحكة م القلب طالعه
الصور بقت مجرد رتوش والوان
بس باهته
من غير الاحباب
رجعنا ندور
العيب في مين
الزمن….زي ماهوا
هي القلوب اللي اتغيرت ….وبعدين
نكتب ونقول
الحيرة .؟.
ولا نرمي اللوم ع الزمن
الكل عنده البوم صور
ياريت نراجع نفسنا
ونشيل الرتوش والألوان
ننادي علي اللي باقي مننا
نلم بعض نعمل لمه
ان شاله نسلم زي يوم العيد ..
بلاش نهرب بعيد
ونقول مش فاضين
لا فاضين
عارفين
فاضين من الحنين بتاع زمان
ب نرمي اللوم ع العيله
بنقول بقينا لوحدينا
تعالوا نقفل البوم الصور بعد ما نشيل التراب من عليه
نبوس كل صورة فيه
اللي فارق واللي حاضر
تعالوا نعمل لمه
ونعيد الذمه
كفايه علينا غربه
راجع البوم الصور