خلصنا
خلصنا
خلصنا بقا تفجير
بكفّي الّي صار بوطنّا
بدّي إسأل :تُرى الّي بياخدوا قرارات
وما بيسألوا عن قسم كبير من الشّعب اللبناني…
تُرى مانُن عن يساهموا بخراب الوطن…
برغشة زغيرة قتلت ثور
رجعوا ل لافونتين (la Fontaine)
لا تستخفّوا بحدا
قولكن كمان الّي عن يتحركشوا بمجرمين معن أكتر سلاح متطوّر
مانُن عن يساهموا بخراب الوطن
كمان سؤال:الشّعب الفقير الّي ما بيعرف معنى الوطنيّة
وما تربى عليها،وما بتتطلّع فيه دولته
بموت ع بواب المستشفيات
أكيد بدّو يبيع بلاده ليعيش
ويتجسّس للغريب ويساهم بخراب وطنه
الموت مانو صعب عالحكّام الملياني جيوبن،
وأفضل الأطبّا معهم ليل نهار إذا مرضوا
علاجن مأمّن…
وما بفكروا بالنّاس المظلومين الّي
بيصعب عليهن يقبعوا شوكن بإيدن
وكل كيانن شوك ومهانة
مين ساهم كمان بخراب الوطن
مانو الّي سرقوا خيرات البلد وأموال المودعين
وجَنْسوا الغربا ليزيدوا ثروتهم ،و…و…إلخ…
والمدارس التّابعة لرجال الدّين الّي ما في رحمة بقلبن
هلكوا الأهل بالأقساط
وعابدين المال وعابدين حالن
مانُن معفيّين من انهيار الوطن
والّي كانوا يوقفونا عالحاجز وياخدوا ربطةالخبز
وتنكة الزّيت ،و…و…ويحاسبونا عالهويّة
وساهموا بالانقسام بين أبناء الدّين الواحد وتخلصوا بطريقتهن من الواقف بدربن
وكلّنا منعرف الّي صار وسبّب عار
ترى بنيوا أم خربوا وطن؟
ولو بدنا نعدّ ما منخلص
ضيعان هالبلد فيكم
إذا خربتوا البلد ، فمهيئين بيوت برّا…
عملتوا بحكمةًً الحيّة الّي عندها وكرين
بتعيش
وبتتصرّف بغريزتها وما بتنلام.
بينما الإنسان ما بيقدر ينام ع مخدتو
مرتاح ،إذا كان عندو ضمير
للأسف كتار باعوا ضميرهم وباعوا وطنهم…
الحسناء ٢٠٢٦/٦/٢٩
