يابيـوت زمان …
يابيـوت زمان
فينك و فين راح الوفا … و عمري اللي كان
يابيـوت زمان
ياللي حيطانك كات دفا ….. و سـقفك أمـان
فارشه الحنان ع المصطبه … فاتحه البيبان للطبطبه
حاضنة الغريب قبل القريب و أكتر كمان
و الذكـــريات ويا الصبا … مع ناس بريئـــة و طيبة
و لا أخ عمــره يعض ف أخـــوه مهما كان
يا بيوت زمان فين ضحكنا ……. بعدك بقينا دبلانين
روحتي و خـدتي عمـــرنـا …. وخدتي ناسنا الطيبين
فين الطابور و المــريله ….. و الحاوي لما يقـول جلا
والسيجة والكورة الشراب … في جرن فاتح ع الخلا
صوت الٱدان وقت العشا … وعيال جيراني وحتتي
وطبليـه تجمــع ع العشـا … خالتي و بناتهــا و عمتي
شكمه وحصيره و مبخره … فــرن و فطيـره مسكـره
لمـة جميلة و ناس عــزاز .. على لمبه جاز في المندره
يا بيوت زمان اشتقت انا ….. وتعبـت من كتر الحنين
نفسي لو أرجع كام سنه .. واعيشلي فيكي ولو يومين
الوقفه و اللبس الجديد … اخده فحصني وانام سعيد
حصالتي و انا مستنيبن … مصروف نلموا ف كل عيد
أراجوز ومرجيحه وجاه … و الفـرحه واقفـالي انتبـاه
البال دا كان رايـق تمــام …… و كأني مـــالك للحيــاه
يا بيوت زمان
ياللي ف بيتنــا مجمعـه .. … كل الجيران
يا بيوت زمان
ياللي سطوحك كان دعا …….. وقت الأدان
فارشه الحنان ع المصطبه … فاتحه البيبان للطبطبه
حاضنة الغريب قبل القريب و أكتر كمان
و الذكـــريات ويا الصبا … مع ناس بريئـــة و طيبة
و لا أخ عمــره يعض ف أخـــوه مهمـا كان
.
كلمات
الشاعر اللواء محمد هيكل
