ناس وناس …
بقلم الشاعر … حليم محمود أبو العيلة
ناس وناس …
كانت فين عُقولنا لما تاهت
من ايدينا حُلول المَسْألَة
فيه ناس بِتفهم بالإشارة
وناس عُقولها مُغَفَلَة
قُلوب بتفهم بعضها
وقُلوب تِعملها مُشكِلَة
عالم عايشة ف ذُل
وغيرها بالورود مُكَللَة
ناس كل شئ مُتاح لَها
وناس بذنوبها مُكَبلَة
عِباد دعاهم مُستجاب
وعباد أفعالهم مُهلِكَة
وشباب سَهلُهُم صعب
وشباب صِعابها مُذللَة
رجال عايشة بعرق غيرها
ورجال ف الصباح مُتوكلَة
نفوس مِتهانة وجعانة
ونفوس شبعانة مَأصلَة
أرواح نفديها بِكُل غالي
وأرواح ضمايرها مُحَللَة
زهور روايحها بتفوح
وأشواك ف ربيعها مِتحلِلَة
ناس رافعين روسهم بالكفاح
وناس عايشة عالة مُتطفلَة
رِقاب مرفوعة في السما
ورِقاب محتاجة مقْصَلَة
بقلم الشاعر … حليم محمود أبو العيلة
مصر
