بشبه مين؟
………………
أنا أشبه جمال الليل
عبير النسمه وقت الفجر
أنا صافيه كموج النيل
ورمش عيوني حد السيف
جراحه ف القلوب البكر
وأنا الحلوة اللي بتعاجب
بقالي سنين
وأنا الماضي وأنا الحاضر
و كلى حنين
عرفت ياسيدي
أشبه مين ؟
أنا الشاريه وأنا البايعه
ما يفرق مين
أنا الأستاذه
علي كل اللي متكبر …
وأتكبر
وده حقي بقاله سنين
أنا التلميذة لولاد الأصول الزين
وللجامدين وللجادين
أنا الليدي اللي بتقدر الغاليين وكل الناس
في حضرتها تتمني
تبوس أيدها
أنا المشهورة بالضحكه
اللي بتصحي رموش نايمين
و تأسر
م القلوب ألفين
أنا اللي الدنيا حبتني
ونصفتني
لكن .. بالبين !
وبيني وبين ميلة بختي وأوجاعي
شراكة سنين
عرفت أنا مين وبشبه مين ؟
أنا بشبه بياض العين
لبن صافي للشاريين
و سوادها للخاينين
وبكرهه غربتي عنك
وأحبك
حب ناس ساذجين!!
(أحط الماضي ع الحاضر )
وأشطب فيهم العناوين
ياخدني حنين
لآخر لحظه كنت معاك
وتشويش فكري ويا العين
جمالى حزين !!
وحلم كتير من العاشقين
وجوايا خلايا الشوق
و معجونه
بزهور ياسمين
سرح فكري
وحبيت فيك ورع زاهدين
عرفت أنا مين؟
أنا النسمه اللي يوم ماتمر علي قلبك
تتمني يكون قلبين
وتدعي تعيش كمان عمرين
أنا الحضن اللي كان نفسك
دفاه يروي عطش شفتين
وأنا الشمس اللي يوم البرد تتمني
تلفك م الحسد والعين
عرفت أنا مين وبشبه مين ؟
أنا الحب اللي أهملته وسبته
يخبط الكفين و يعاني لوم وأنين
وأنا البنت اللي حبت فيك
بساطه الروح وخفتها
ولما قسيت
شالت لك كل لحظه حب ..
همسه ود جوه الروح
وجوه العين
مقسومه علي قلبين ؛
كلمات الشاعرة
هيومه حمزة
باكينام حمزه
Discussion about this post