مش باقية ع الباقى اللى كان

مش باقية ع الباقى اللى كان

ف الطَل ساندنا

ولا ماسكة خيوط واهية

وخيال ماشى يسابقنا

وهرمي الماضى وافتح

للرحيل أبواب

وأحوَّط ضعفى بجدار صلب

بميلة الضل

وافوت من جنب حدوتة

بدون بواب

ياوجع سارح وسارقنا

ونابت جوَّا قلب سراب

بميت سرداب

وطارح شوك ف أرض الملح

ومن امتى كات تطلَّع طرح

أو تبل الريق

يا أوفى خل بيجرَّح بإيده صديق

يا بُعدك اللى مكتوبلى على الجدران

خطوط بوية

فقلت أتحنى بمسك جبينك أتوضى

واتشعلق بنور أبريقك الفضة

وفكراك إيد بتحن وتطبطب

وصورة حلوة لأبويا

وكلمة وضحكة ساعة الضيق

لقيتك ليل طويل واهى ومحض خيال

مش باقية ع اللى عدى وراح

ولا باكية على الفايت دى قلة عقل

ومين ساب إيده وقت الغرقة

ومين كان بادئ الفُرقة

وبدِّل اللقا بجراح

ياشارع سكته مفتوحة وجريئة

وفارد شعوره ولا عامل للغريب

دا حساب

ياقلب براح لكنه ماسعش يوم حضنى

وضاق فى عيونى وف وشى

انا همشى ماكان مارجلى هتاخدنى

ماتسألشى الطريق ماشى مابستناش

ولا بيداوى أوجاع حد

وان كان بُد تاخد سيلفى ويَّا الجرح

أنا موجودة على ناصية ربيع مبجيش

ولا بيوِد ولا بيودي أى طريق

ولا زهَّر ولا فتَّح ف يوم وشه

ومسجون جوا تقفيصته

ولا فارق بيبان عشه

ونفسه يكون حر طليق

وفايتنا هنا ف الطَل لشتا برده يكسَّرنا

وصيف ناره بتعصرنا كما الأشباح

مش باقية على حبة عشم راحوا

ف التوهة ولا رجعوش

ولا دقة قلب مشبوهة

وناس متلونة بوشوش

وسكة تايهة معووجة وحلم فشوش

مش باقية على أحدٍ من المخاليق

ولا حد فى عينى بريء

لحد مايثبت هو العكس

وينام جوا عينه الضى يتدفا

ف حضن الشمس

يلقانى ووشه بشوش

ويعدى النهار بشويش

مايخافش كلبش شاويش

ولا رتبة بعقال فالصو

ولا افرد إيدى للبايعين

فتترد الإيدين بمفيش

دا حُمرة خدى متلوِّن بعزة نفس

لا هتدارى ف حوارى التيه

ولا هبقى لحد شبيه

ولا عمرى هيتباع بخس

كلمات

الشاعرة رضا عبدالوهاب