فاكر يابحر،،، للشاعر مختار عبدالفتاح
،، الشاعر مختار عبدالفتاح
٠٠٠٠٠٠
انا كنت عابر سبيل
وخدتنى دهشة مشاعرى
وانفلاتى من القصيدة
وارتحالى عن الغنا
من وحشة الليل الغريب
ودرب خالى من السنا
وعشق ملفوف بالوجع
فنسيت اقول لك حكايتى
وتقوللى…عايزه صبر
فاكر يابحر
انا كنت باضحك تمللى
واعزف على المزامير
ودواير الهمس البريئة
وشقاوة العصافير
وكنت باطلع ساعات
دخان من القوارير
وكنت بابقى سندباد
وكنت تايه فى العبير
فنسيت اقول لك قصيدتى
وتقوللى…عايزه صبر
فاكر يابحر
انا كنت صاحب لصاحبى
والمس جراحى…تئن
وكنت صياد المعانى
وكنت ديك الجن
أغزل خيوط الشجن
واعزف لطير المسا
واضحك قوى..وكأن
شطك بقى صاحبى
وغنوتى نرجسة
لو نبتعد…بنحن
فنسيت اقول لك غنوتى
وتقوللى…عايزه صبر
فاكر يابحر
Discussion about this post