هاخد قلبي
هاخد قلبي ف حته بعيدة
وأحكى معاه عن ظلم الناس
أنا عارفة مش هبقى سعيدة
وبروحى مات الإحساس
هفرش نفسي كده قدامه
وأفتح صورة كانت محفوظة
جوة مخازن كات مركونة
وعينى عليها إتنين حراس
هعمل ليلى دفاير سودة
تنزل على ضهري كما السيف
يقطع كل طريق مشيناه
وقت ما كان الحب ظريف
هبنى ما بينهم مليون سد
هتعب عارفه ولا ألقى حد
يسند طولى وقت الجد
هاخد قلبي ف حته بعيدة
وهعلمه مايكونش ضعيف
أصل الضعف فيه بيموت
مين كان جنبه يوم وطواه
جوة حضن ودفا دا إتألم
لما ماكنش حد معاه
وهعرفه على كل الغالى
إللى بأرخص سعر دا باعه
واللى وقت الشدة رماه
هاخد قلبي ف حته بعيدة
وهكلمه عن كل أحلامه
لما طرحها مزاد للبيع
لما حاولت أكمل بكرة
وكل أحلامه قوام بتضيع
طب أحلامه مين كان خادها
أو قاله أنا شارى وحافظ
كل ما واحد كان بيقرب
كان بيغنى على ليلاه
هاخد قلبي ف حته بعيدة
وهنسى معاه الماضي كله
من أشباه لديوان كان كاتبه
بس ملوش عنوان وياه
هنسى معاه الذكرى المرة
ونعمل منها جناين ورد
تطرح جوة الروح بعطورها
ألف مدينة مافيهاش حد
كلمات الشاعرة
عزة السعدنى
