هواكي دايما يوسفي
دمعتك لحظة فراقنا
و فرحتك وقت اللقا
كل حاجة فيكي حلوة
لكن يا خساره بريئة
و عمرك ما كنتي ع الحياه متودكة
ما بتملكيش وقت الألم إلا البكا
و بحر الدموع
مش فاهمه إيه معنى حبيبك من عدوك
حتى لو كان مفتري
قلبك طري
مليان حنان لدا و لدا
عمرك ما كنتي مسهوكه
و لا كنتي يوم متشعوطه
لكن عنادك بكرهه
بكره سكوتك ع الوجع
بتشوفي دمعي و تهربي
و تدوري جوا الودع
على ضحكه حلوة مغربي
نفسي مره تشرقي
و على قلبي تيجي تطبطبي
ناسياني ليه و رامياني دايما من قاموسك؟؟!!
إياكش فاكراني غبي
مقدرش اشيلك في الوجع ؟؟!!
لاء فوقي يا امه و صحصحي
دا انا برضه و حياة النبي
طول عمري شايلك في الضلوع
هواكي دايما يوسفي
للبر لو يوم تتعبي
و قلبي سفينتك في الرجوع
و برغم إني ليكي بار و وفي
قاعده ،،، بالمر فيا بتحدفي
يا لا اسلكي و اتودكي
كل اللي فات نردم عليه
و نقيد من تاني بادينا الشموع
كلمات الشاعرة
وفاء يوسف
