الدنيا مسيرها ح تدّي لك …
بقلم الشاعر … ابراهيم عوض
الدنيا مسيرها ح تدّي لك …
……………….
العيبه ان طلعت من ناسها
ما تلومش عليهم و تعيّب
و عشان بأمورك تفرسهم
خلّيك على ما انت كمان طيّب
و ان قالوا عليك : خايب ميّل
ما توقفش قصادهم تتكلّم
و زمانّنا بحمّل و يشيّل
و الجارح بكره ح يتألّم
فبأصلك خلّيك ويّاهم
و الدنيا مسيرها ح تدّي لك
مش مال و لا جاه خلّيك فاهم
دي حاجات من ربّك ح تيجي لك
و ييجوا لك تاني و يعتذروا
و ح يسعوا و حاولوا لمرضاتك
فما دامهم على جرحك قدروا
إيّاك تقبلهم ف حياتك
ماتقولش ازّاي و لا تستغرب
و لا مرّه تقول : ده ماهوش جايز
و حياتك راح ييجوا لعندك
و يبوسوا إيديك يوم لو عايز
الدنيا ماهيش على كيف واحد
و لا شئ واحد و لا لون واحد
الدنيا مسيرها بتتغيّر
و بنتغيّر واحد .. واحد
فبلاش تستغرب من حالهم
و لا تسأل و تقول : دول مالهم
ده طبيعي و عادي ف دنيتنا
فضروري إن احنا قوام ننسى
ما نسيبش القهر يموّتنا
أو نصبر و نقول : لأ لسّه
دول ناس معدنهم م الفالصو
و بياكلوا و ينكروا و بينسوا
و انت اللي ف طيبتك دول خلصوا
و دي خلق على الطيّب يقسوا
فبلاش تحسبها بحسبتهم
و لا تفضل دايماً لعبتهم
و العيبه ان طلعت من ناسها
ما تلومش عليهم و تعيّب
لكن من حقّك تفرسهم
و اتغيّر و لا تفضل طيّب…!
بقلم الشاعر … ابراهيم عوض
رفعت للتصميم
