التجاوز إلى المحتوى
كلمات الشاعرة
سارة زيادة
السيرك …
سيرك ومنصوب
والكل بيلعب ع لاحبال
وقرود بتقلد بني ادمين
وشباب بتبين لمواخذه
وعملالنا قرود
رجاله شقيانه و طلقها حامي
وغوازي اماره ف ليل فتارين
والفيل ماشي بايديه لاتنين
والديك بقا يصحى الساعة واحده
والسبع بيرقص ع الواحده
ومراته تنط تعدي الطوق
تعابين بتزمر و الزَمار مش راضي يفوق
اراجوز وف ايده العصا والنار
غربان بتحوم
…….. تعلب بيفوت
ترابيز ابطاله بتتنطط
…….. مش خايفه تموت
وعيال بتحدف بنبوني
وعيال مش لاقيه يا عيني القوت
سيرك ومنصوب
بلياتشو حياته يادوب شخابيط
شبه البطيخ
………. شبعان تخبيط
مش عارف مره يكون مبسوط
ازاي حيضحك خلق الله
وعياله م الجوع قدامه بتموت
تيك توك وهريانا اوحاله
والكل بيزعق على حاله
والشاعر بقى… مين اوحاله؟
ان الأحلام كلمات وبيوت
والفن بقالنا سداح في مداح
سنكوحه وتقول شعبنا هلفوت
مبقاش في اللعبه خلاص غالب
كلنا مغلوب
سيرك ومنصوب
كلمات الشاعرة
سارة زيادة
