خذوا الحكمة من بياع السجاير .. حكاية طويلة بس كلها حكم وتسالى

خذوا الحكمة من بياع السجاير .. حكاية طويلة بس كلها حكم وتسالى

========

الزبون للبائع :عايز علبة مارلبورو أحمر وباقي 200
= طب هات ال 200 جنيه الأول بس عشان ما انساش
_ متنساش إيه يا حاج ، دا مفيش غيري في المحل اصلا
= انت عايز الحق وللا ابن عمه ؟
_ انا ماليش علاقة بالمشاكل الأسرية دي
= طب من ابو آخر ، أنا مش واثق فيك ، شكلك مش مريحني
_ ليه بقى ان شاء الله ، شكلي نصاب يعني وللا حرامي ، هاخد السجاير والباقي واجري
= بالعكس ، شكلك محترم جدا ، لف برويتا كدا
_ أفندم ؟
= لف بس
_ اللهم طولك يا روح ، اهو يا حاااج
= طول بعرض ، بشياكة ، الله أكبر ، مدير بنك ، بس لا مؤاخذة زايد من الجناب حبتين ، شكلك بتاكل وتنام
_ انت بتقول إيه يا حاج
= بقول ان شكلك محترم جدا ، وباين عليك ابن ناس ، وزبيبة الصلاة منورة في وشك ، دي مش زبيبة ، دي برقوقة ما شاء الله
_ الله يكرم أصلك يا راجل يا بركة ، اتفضل ال 200 جنيه اهي
====================
= وشكلك المحترم دا هو اكتر حاجة تقلق فيك
_ ليه بقى
= شوف انت زي ابني ، وانا ارتحتلك ، وعشان كدا هعلمك درس
_ اتفضل يا حاج
= أولى الناس بالشك أبعدهم عن الشبهة
_ يعني إيه
= يعني بيه محترم زيك كدا هو اللي لازم اقلق منه مش أي حد تاني
_ إشمعنى ؟
= عشان كل النصابين الكبار بهوات زي حضرتك كدا ، الاحترام دا إكسسوار الشخصية
_ يعني انا نصاب يا حاج ؟
= لا سمح الله يا ابني ، انا بس بديك درس
_ طب كمل
===========
= الخيانة مبتجيش غير من الشخص اللي مينفعش تشك فيه
_ جايز
= لأ مش جايز ، دا أكيد ، انت تعرف ان العرب قبل الاسلام كان عندهم طقس ثابت في الحج
_ طقس إيه ؟
= كانوا بيرجموا قبر ابو رغال
_ مين ابو رغال دا يا حاج ؟
= دا أشهر خاين عربي في التاريخ ، دا دليل جيش أبرهة الحبشي اللي كان جاي يهد الكعبة
_ يا ابن الصرمة
= نعم
_ مش انت يا حاج ، كمل كمل
= اغتيال يوليوس قيصر ، مش دي برضو اكبر مؤامرة في التاريخ ؟
_ لا الحقيقة معنديش فكرة
= ما عشان جاهل ، جحش لابس فورمال
_ ربنا يكرم أصلك يا بابا الحاج
= كل رجالة قيصر اتلموا عليه في مجلس الشيوخ الروماني وكل واحد طعنه طعنة
_ يا كبد امه
= شاف في وسطهم بروتس ، صاحبه وحبيبه وأقرب واحد ليه ، استنجد بيه ، كان فاكره جاي ينقذه
_ وأنقذه يا حاج ؟
= طعنه الطعنة اللي خلصت عليه ، وقال كلمته الشهيرة ، حتى أنت يا بروتس ؟ إذن فليمت قيصر ، طب اهو
_ قصة صعبة اوي
= الظاهر بيبرس ، أقرب صاحب لسيف الدين قطز
_ اه بتوع مسلسل الفرسان
= اسم الله عليك ، مش هو برضو اللي خلص على صاحبه وصديق عمره ؟
_ فعلا
= الشيخ اسماعيل الهواري ، ابن عم شيخ العرب همام ودراعه اليمين
_ الفنان عبد العزيز مخيون
= شاطر ، مش هو اللي خانه وسلم جيشه للمماليك ، بعد ما كان ملقب بأمير الصعيد ؟
_ عندك حق والله
= الفنانة وداد حمدي ، اشهر خدامة في السينما المصرية
_ اه عارفها دي
= وتعرف بقى ان اللي قتلها واد كومبارس كانت دايما بتعطف عليه وتساعده
_ الوااااطي
= هي الحياة كدا ، دايما الضربة بتجيلك من الحتة اللي متتوقعهاش ، قولي صحيح انت متجوز ؟
_ اه
= بتثق في مراتك ؟
_ ثقة عمياء
= ليه ؟
_ عشان ست محترمة وبنت ناس وبتحبني
= اهي دي كلها عوامل شك اكتر منها عوامل ثقة
_ يعني ايه ؟
= يعني الضربة مبتجيش غير من المحترمة بنت الناس اللي حاطة وشها في الأرض دي
_ انت هتخرف وللا إيه يا حاج
= يا ابني هي مراتك احسن من بروتس ، وللا بيبرس ، وللا الفنان عبد العزيز مخيون ؟
_ لأ هي شبه الفنان عبد العزيز مخيون بس مش احسن منه
= انت أقرب صاحب ليك اسمه إيه ؟
_ محسن
= يا نهار اسود ومنيل ، اسمه محسن وواثق فيه ؟
_ إيه علاقة اسمه بالموضوع يا حاج
= الناس عادة لما بتكبر بتداري وحاشتها بصفات حلوة عشان تعمل تمويه
_ صح
= دا نازل من بطن أمه مموه ، تقدر تقولي أهله شافوا فيه إيه عشان يسموه محسن ؟ كان نازل ماسك سبحة يعني ؟
_ أكيد لأ .. بس ..
= انت لسه هتبسبسلي ، إلحق بيتك اللي بقى مزبلة
_ اعمل ايه
= طلع تليفونك ورن على مقصوفة الرقبة ، هي اسمها إيه صحيح ؟
_ مفيدة
= مفيدة ؟ ليه ان شاء الله ، فيها حديد وڤيتامينات ؟ رن عليها اخلص
_ اهو ، اهو ، تليفونها ويتنج
= الله الله ، اهو دا اللي كنت عامل حسابه
_ دا معناه إيه يا حاج ؟
= معناه إن حضرتك نزلت من هنا ، وهي اتصلت بعشيقها من هنا
_ عشيقها ؟؟
= انت لسه هتتصدم ، رن على محسن بسرعة
_ اهو .. دا ويتنج هو كمان
= طبعا لازم يبقى ويتنج ، اكيد بيقولها البأف نزل وللا لسه
_ مين البأف دا ؟
= هيكون مين يعني ، أكيد انت ، ياما قولتلك متثقش في حد ياما
_ ياما ايه يا حاج انت هتعمل فيها خالي ، انا لسه شايفك من عشر دقايق
= انت لسه هترغي معايه وتسيب محسن يخونك في بيتك وعلى فرشتك وببچامتك
_ لأ ، بيچامتي لا
= اشمعنى ؟
_ محسن ريحته وحشه اوي
= طب يالا بسرعة ، روح اغسل عارك ، يالااااا يا ابني اتحرك
_ طب هات علبة السجاير وباقي ال 200 جنيه
= أنا يا ابني خدت منك 200 جنيه ؟؟!!